Սփիւռքահայ երիտասարդները կը միանան ArmEssence ծրագրին շնորհիւ

Հայկական Բարեգործական Ընդհանուր Միութեան (ՀԲԸՄ) Հայկական Համացանցային Համալսարանը (ՀՀՀ), որպէս կրթական ոլորտի առաջատար հաստատութիւն, կ'օժանդակէ սփիւռքահայերուն ուղղուած Մայր Աթոռ Սուրբ Էջմիածնի նորաստեղծ ArmEssence ամառնային կրթական ծրագրի իրականացման: 

Ծրագիրը կը համախմբէ հայ երիտասարդները՝ լեզուի, պատմութեան եւ հաւատքի հովանիին տակ: ArmEssence-ի նպատակն է ամրապնդել հայ երիտասարներու կապը իրենց ինքնութեան հետ, տրամադրելով  տարբեր դասընթացքներ եւ կազմակերպելով   ուխտագնացութիւններ ու ձեռնարկներ: Ծրագրի կրթական մասը ամբողջութեամբ ապահոված է ՀԲԸՄ ՀՀՀ-ը:  

Մասնակիցները կը հետեւին արեւելահայերէնի եւ հայոց պատմութեան դասընթացքներուն: Դասերը կը վարեն ՀԲԸՄ ՀՀՀ-ի դասախօսները՝ Մայր Աթոռ Ս. Էջմիածնի կրթական կեդրոնէն ներս: 

Ուաշինկթընէն եկած Նիքոլէթ Պրէքուէլը կ'ըսէ. «Ես ոչինչ գիտէի մեր պատմութեան մասին, բայց հիմա շատ բան գիտեմ։ Ինծի համար շատ կարեւոր է: Շատ ուրախ եմ, որ մասնակցած եմ այս ծրագրին»: 

Երեք շաբաթ տեւող ծրագրի աւարտին, ՀԲԸՄ ՀՀՀ-ի Հայոց պատմութեան դասախօս՝ Անի Տեկիրմէնճեանը եւ Հայոց լեզուի դասախօս՝ Մարիամ Յարութիւնեանը կը հաստատեն, որ մասնակիցները շատ բան սորված եւ իւրացուցած են՝ կարճ ժամանակի ընթացքին. բան մը, որ իսկապէս զարմանք պատճառած է:  

Այս ամառ ծրագրին մասնակցելու ընդունուած է 36 հոգի, որոնք բաժնուած էին երկու խումբի: Մասնակիցները եկած էին Ռուսիայէն, Ղազախստանէն, Վրաստանէն, Աւստրիայէն, Պրազիլէն, Մեծ Բրիտանիայէն եւ ԱՄՆ-էն: ՀԲԸՄ ՀՀՀ-ը իր դասընթացքները անվճար տրամադրեց բոլոր ուսանողներուն, որպէսզի յետագային, Հայաստանէն մեկնելէ ետք, դասընթացքներուն հետեւելու առիթն ունենան:  

Ծրագրի մասին տեղեկութիւններ ստանալու համար հետեւեցէ՛ք «Շողակաթ» հեռուստաընկերութեան տեղեկատուութեան՝ այստեղ:⬇️